DARDO Instituto do Deseño e das Artes Contemporáneas

diseño editorial

 

Vigo, 1948 – 2001

Pintor e deseñador gráfico

Deseño do libro Fumareu

Fabricante: 
Editorial Galaxia

Francisco Mantecón destacou como artista expresándose a través de diferentes técnicas e linguaxes. Fixo carteis e deseños publicitarios para entidades culturais, para organizacións políticas e sindicais e para empresas como Terras Gauda ou Conservas Alfageme. No mundo editorial, traballou para Galaxia, deseñando coleccións como a Dombate de poesía e portadas como as da colección editada nos anos 80 de narrativa; deseñou a colección Cómplice de Edicións do Cumio, os Clásicos Galegos da editorial Sotelo Branco, varias series de Ir Indo Edicións, ou a colección Ferros de Xerais, á que pertence este libro. Nesta portada aprécianse algunhas das súas sinais de identidade como o emprego de formas xeométricas e a preferencia polo monocromo.

 

Pontedeume, 1955.

Deseñador.

Galicia Cen

En corenta anos de actividade profesional, o conxunto do traballo de Pepe Barro pode entenderse como unha lectura da Galiza que renova as súas sinais de identidade, incorporando as linguaxes do deseño internacional. Algúns traballos coñecidos: identidade gráfica da Universidade da Coruña ou da empresa Denodo, os primeiros “cuponazos” da Once, a camiseta da Selección Galega de Fútbol, a web da Real Academia Galega, a renovación da Casa de Rosalía de Castro. En 2000 o Museo Reina Sofía, elixiu o de Turgalicia coma un dos cen signos do século XX.O libro Mis queridos diseñadores de Enric Satué dedícalle un capítulo. Este libro é un dos resultados do programa do Consello da Cultura Galega titulado Galicia100. Obxectos para contar unha cultura, que busca difundir a historia e a cultura de Galicia a través dunha selección de cen pezas desde o Paleolítico ata os anos 90 do século XX.

 

Oporto, 1996. Axencia de creatividade e deseño estratéxico.

Libro corporativo da gráfica da cidade de Oporto

Libro corporativo da gráfica da cidade de Porto, 2014

Un caso de éxito recente no que se refire a identidade visual dunha cidade é Porto, que partindo da súa tradición histórica co azulexo proxectará unha nova imaxe en base a sinxelos pictogramas azuis. O responsable do proxecto foi White Studio, da man do seu fundador Eduardo Aires, que confesará que, neste caso, o briefing estaba ben definido, o que facilitou o seu desenvolvemento. Así, prescindirán de calquera imaxe para quedar co nome da cidade. A tipografía, sólida e sensual, de caracteres moi próximos entre si, potencia a palabra, que acaba cun punto sobre o que cae o gran peso visual. «Porto.» é, ademais, de cor azul, a cor das súas igrexas e edificios revestidos de azulexos, que son unha especie de retrato estático da vida urbana.

 

Ferrol, 1917 – 2006. Ilustrador.

Deseño de portadas para Editorial Galaxia

Deseño de Xohán Ledo para portadas de libros da Editorial Galaxia, 1965-72

Editorial Galaxia fundouse en 1950 coa vocación de recuperar a significación histórica e o valor cultural da lingua galega na creación e na transmisión de pensamento. Simultaneamente comezou a publicar a revista cultural Cadernos Grial. Impulsada por ilustres galeguistas como Ramón Piñeiro, Francisco Fernández del Riego e Xaime Isla Couto —a quen se lle debe o primeiro logotipo— contará con deseños e ilustracións de artistas como Luís Seoane ou Carlos Maside, aínda que serán os deseños de Xohán Ledo primeiro e de Francisco Mantecón e Manuel Janeiro despois os que dominen as súas populares portadas.

 

A Coruña, 1952

Artista plástico

Revista A Galga

Revista A Galga nº cero, 1978

A creatividade de Correa Corredoira e de Xaime Cabanas forma parte da súa forma de ser e as súas obras están cheas de sensualidade, de vida, de dor. Ambos comezaron a destacar no mundo das artes nos setenta e máis tarde fundaron o colectivo A Galga, xunto a outros artistas, creadores e poetas de espírito crítico e comprometido, coa intención de transformar a arte daquel momento. O colectivo tiña un carácter informal, non prestando moita atención aos protocolos asociacionistas, porque o importante era o impulso e a posible influencia no mundo cultural. Chegaron a programar accións controvertidas do que ata entón podíase atopar en Galicia. Coa ansiedade por modernizar o panorama cultural coruñés publican o número A Galga n.º cero, creado en 1978 pero presentado anos despois, que nace da vontade de chegar á renovación da arte desde ámbitos moi diversos, como a poesía experimental ou o cómic.

 

A Coruña, 1953 – 2013

Artista plástico

Revista A Galga

A Galga n.º cero, 1978

A creatividade de Correa Corredoira e de Xaime Cabanas forma parte da súa forma de ser e as súas obras están cheas de sensualidade, de vida, de dor. Ambos comezaron a destacar no mundo das artes nos setenta e máis tarde fundaron o colectivo A Galga, xunto a outros artistas, creadores e poetas de espírito crítico e comprometido, coa intención de transformar a arte daquel momento. O colectivo tiña un carácter informal, non prestando moita atención aos protocolos asociacionistas, porque o importante era o impulso e a posible influencia no mundo cultural. Chegaron a programar accións controvertidas do que ata entón podíase atopar en Galicia. Coa ansiedade por modernizar o panorama cultural coruñés publican o número A Galga n.º cero, creado en 1978 pero presentado anos despois, que nace da vontade de chegar á renovación da arte desde ámbitos moi diversos, como a poesía experimental ou o cómic.

 

Bremen, Alemania, 1970

Directora creativa

Vitamin D

Deseño da publicación e portada do libro Vitamin D de Phaidon, 2006

Deseñadora gráfica alemá formada na Universidade de Arte e Deseño de Karlsruhe, onde comezou a traballar para o sector cultural no deseño editorial, de carteis e identidade corporativa. En 1998 inicia as súas colaboracións para Phaidon Press introducindo un novo enfoque nas publicacións de arte. Actualmente é a directora creativa da editorial, dirixindo o departamento de deseño. Especializada en arquitectura, arte, fotografía e deseño, Phaidon cultivou grandes éxitos cos seus catálogos, coñecidos pola calidade e a súa capacidade de transmitir a experiencia da arte a través do papel. A mirada de Julia Hasting contribuíu á consolidación da editorial, traballando cada parte do libro como un conxunto interconectado onde estética, contido e composición terminan por compor un obxecto único. Visualmente atraentes, as súas propostas convidan ao descubrimento como parte do exercicio da lectura.

 

Pensilvania, EEUU, 1964.

Deseñador gráfico.

Deseño da portada da revista Rolling Stones

Edición da mellor música da década dos 2000 

Escritor, editor e deseñador gráfico, Chip Kidd é mundialmente famoso polas súas portadas de libros e o seu carácter extravagante. As súas imaxes ilustraron historias de todos os xéneros, autores e estilos. Para el, a composición e a orde das imaxes son as responsables de contar unha historia e atrapar a quen o mire dunha maneira determinada. Así, entende as portadas como unha primeira impresión coa capacidade de atraer cara ao produto a partir dese fugaz golpe de vista que debe conter misterio e claridade a partes iguais. Entre outros, destaca a súa colaboración para a revista Rolling Stones, que deu permiso ao deseñador para modificar o seu mítico logo para a edición da mellor música da década dos 2000. Chip Kidd decidiu converter as “O” en ceros, levándoas do título para convertelas no centro da imaxe nun curioso paralelismo coa década homenaxeada. Para Chip Kidd: “O deseño gráfico salvará o mundo xusto despois do rock and roll”.

 

Vilaboa, 1936.

Artista e deseñador.

ZAP Comix

Nº  0, 2, 5 e 6

Artista e deseñador, Victor Moscoso desenvolveu a maior parte do seu traballo en Estados Unidos e está considerado como un dos referentes do deseño psicodélico. O seu imaxinario creativo vai conseguir revolucionar o deseño do século xx. Formado no Industrial Art Institute de Manhattan, na escola Cooper Union e na Escola de Arte da Universidade de Yale, tivo a oportunidade de coñecer e aprender de profesionais da arte e o deseño de primeiro nivel. Viviu en primeira persoa o xurdimento do movemento psicodélico en San Francisco e comezou a desenvolver o seu traballo en torno ao deseño de carteis para diferentes grupos musicais. O horror vacui, o hipnotismo da imaxe, as mensaxes codificadas, os contrastes cromáticos, unha paleta intensa de cores e unha atmosfera igualmente vibrante compoñen algunhas das calidades do seu traballo. Ademais de colaborar coa industria musical, tamén realizou fotografías, animacións, ilustracións, carteis para películas e cómics. Esta última faceta iníciase a partir de 1968 cando se une ao equipo de Robert Crumb, un dos fundadores do cómic underground e editor de Zap Comix. Xorde así un novo estilo onde xa non ten cabida a censura, introducindo nas páxinas temáticas como o sexo ou a crítica política. No caso de Victor Moscoso, mantén un estilo no que os elementos visuais sobresaen por riba de aspectos narrativos ou argumentais, unha liña espontánea e irónica non exenta de certo surrealismo.

 

Monforte de Lemos, 1957.

Artista.

Álbum Esquizoide

Álbum Esquizoide, 1978
Publicacións do “Colectivo da Imaxe”

Antón Patiño é unha figura chave na cultura galega da década dos oitenta. No campo da pintura foi un dos fundadores do grupo Atlántica, un colectivo caracterizado pola vontade de renovación da creación plástica en Galicia. Así mesmo, na súa faceta coma escritor é interesante tanto o seu paso pola revista Loia xunto con Manuel Rivas e os irmáns Xosé Manuel e Lois Pereiro coma o seu papel de colaborador do grupo poético Rompente formado por Alberto Avendaño, Antón Reixa e Manolo Romón e os seus propios traballos en solitario de poesía e ensaio. Esquizoide é unha novela gráfica que supón o primeiro achegamento de Patiño á banda deseñada no ano 1978, trátase dunha peza abstracta e liberada de narración lineal na que a idea principal é facer unha crítica a cuestións como a sociedade de control, a psiquiatría ou a contaminación. Esta aposta experimental dos anos 70 foi reeditada en 2020.

Páxinas