Prato e vasos Bölgeblick

Pioneira no deseño de interiores e de mobiliario, Aino Marsio Aalto foi unha das primeiras arquitectas finlandesas, aínda que moitas das súas obras foron atribuídas exclusivamente ao seu marido Alvar Aalto. Como deseñadora, manexou a pequena escala, xa sexa en arquitectura coas súas vivendas mínimas, como no deseño de cociñas ou en pequenas pezas de vidro para uso doméstico, como as que deseñou para a empresa finlandesa littala. Un exemplo paradigmático é a súa serie de cristal Bölgeblick [vista de ondas], deseñada en 1932 e merecedora da Medalla de Ouro de Deseño da VI Trienal de Milán en 1936. Tamén o deseño do soado vaso Saboy, en coautoría con Alvar Aalto. Aino Marsio recreábase no detalle e nas texturas, sempre desde o funcional e racional, así como cun respecto polo material, sen grandes alardes estéticos nin económicos. Os aros son exemplo dese interese práctico, unha vez que servían para ocultar as irregularidades dun vidro barato prensado. O humano, o cotián e o íntimo dominan o deseño de todos os seus obxectos e arquitecturas, sempre a partir de ideais funcionais e utilitarios. Nada en Helsinqui, graduose como arquitecta no Instituto de Tecnoloxía da súa cidade. En 1935 os Aalto fundaron Artek, unha marca dedicada á creación de accesorios e mobiliario na que combinaban arte e técnica.