María Ramos é investigadora e deseñadora de tipografías. Traballa na súa propia marca, NM Type, creada xunto a Noel Pretorius. Entre os seus clientes atópanse firmas como Jägermeister. O seu traballo como
investigadora e a súa paixón pola historia da tipografía levárona a colaborar con blogs especializados como Typographica ou Alphabettes. A súa tipografía Kinetic, creada en colaboración con Noel Pretorius,
foi merecedora dun Certificado de Excelencia Tipográfica concedido polo Type Directors Club de Nova York. Kinetic é unha tipografía sen serifa inspirada en Alexander Calder, que intenta incorporar características exploradas polo artista como o ritmo, o movemento ou a relación entre obxecto e espectador. Os seus terminais curvados e a súa simplicidade formal permiten a súa adecuación para unha ampla gama de aplicacións. O seu carácter xeométrico está compensado pola liberdade no deseño e o rexeitamento a patróns estritos.
