Zoco Martixe

Elena Ferro pertence á terceira xeración dunha familia de zoqueiros que data do ano 1915. Baixo a marca Eferro logrou transformar un artigo asociado ao rural nun complemento de moda, traballando na reinvención do oficio para integrar deseño e ergonomía co obxectivo de salvagardar os nosos acenos culturais. En liña con outros dos seus produtos, estes zocos destacan polo emprego de cores atrevidas e estampados vibrantes en sintonía coas tendencias actuais, establecendo unha ponte entre a modernidade e os saberes máis ancestrais. Recoñecemos aquí o carácter identitario do zoco a través dunha sorte de mutación en forma de múltiples perfís. Prodúcese, en todo o seu traballo, unha confluencia entre diferentes realidades onde o cotián e a ironía discorren a través dun xogo formal de similitudes.