DARDO Instituto do Deseño e das Artes Contemporáneas

Ciclo Galicia. Un século de creación.

O ciclo de conferencias "Galicia. Un século de creación. 1916-2016" forma parte do proxecto DIDAC Arteria Galicia que dende hai un ano vense desenvolvendo na Fundación DIDAC. Este proxecto, que conta co apoio da área de Cultura da Deputación da Coruña e que desenvolverá agora a súa parte, naceu coa idea de afondar no patrimonio cultural de Galicia e a súa creatividad, contando coa colaboración de recoñecidos profesionais da arte, a arquitectura e o deseño, así como outras manifestacións artísticas.

Aínda que DIDAC é a sede principal do ciclo e do proxecto, algunhas das conferencias tamén serán impartidas noutros centros e institucións da provincia da Coruña. En todas elas, a asistencia ás conferencias é gratuíta tendo prioridade aquelas persoas que teñan realizado a inscrición previamente. Permitirase o acceso ata completar o aforo. Se desexas reservar a túa praza podes facelo no correo electrónico actividades@didac.gal.



  • Sara Donoso
     

    Sara Donoso

    DIDAC. Santiago de Compostela
    xoves, 17 xaneiro, 2019 - 19:00

    Cine, paisaxe, pintura. Unha mirada ao audiovisual galego contemporáneo.

    Moitos traballos xurdidos á marxe da industria en Galicia nos últimos anos, presentan certas peculiaridades que os vinculan coas artes plásticas. Desde perspectivas narrativas e formais heteroxéneas, varios comparten unha asimilación da paisaxe que creba as regras de representación convencionais e ábrense a unha mirada dilatada. Así, a paisaxe galega asoma como unha constante nos creadores que nos ocupan, abordándoo desde múltiples estratexias que en moitas ocasións coinciden plasticamente cos recursos pictóricos. Evidenciados claramente nalgúns filmes (textura, tempo, luz, relación iconográfica) e unicamente simulados noutros, estes vínculos motivan unha relación que se orixina na historia da pintura e cuxo peso no noso imaxinario visual compón unha importante bagaxe previa que logra intervir nas nosas estratexias creativas.

      Sara Donoso é doutora en Historia da Arte pola Universidade de Santiago de Compostela. Actualmente compaxina o labor investigador con colaboracións como crítica de arte e os seus proxectos de educación e mediación cultural, colaborando coa Facultade de Belas Artes de Pontevedra como Community Manager e redactora.
      Entre os seus proxectos recentes destacan a coordinación do ciclo Moda e arte. Confluencias e hibridacións para o MAC de A Coruña, ou o relatorio Cine, paisaxe, pintura. Unha mirada ao audiovisual galego contemporáneo na Facultade de Filosofía da USC. Comisariou, entre outras, exposicións como O deseño na oficina no século XX. Da máquina de escribir ao ordenador persoal; Puntos de pintura ou Loureiro. Perfís de realidade, e coordinou mostras como o 23 Premio Internacional de Gráfica Máximo Ramos 2014 (2014).
      Destacan as súas publicacións Antes, durante, despois. Entrevistas con exestudantes da Facultade de Belas Artes (2018); Paisaxe e pintura no audiovisual galego contemporáneo. Dous casos prácticos que se abrazan dende os extremos: Carla Andrade e Xisela Franco (2016). Colabora con revistas como DARDOmagazine, Fotocinema ou Obradoiro de Artesanía.