DARDO Instituto do Deseño e das Artes Contemporáneas

Ciclo Galicia. Un século de creación.

O ciclo de conferencias "Galicia. Un século de creación. 1916-2016" forma parte do proxecto DIDAC Arteria Galicia que dende hai un ano vense desenvolvendo na Fundación DIDAC. Este proxecto, que conta co apoio da área de Cultura da Deputación da Coruña e que desenvolverá agora a súa parte, naceu coa idea de afondar no patrimonio cultural de Galicia e a súa creatividad, contando coa colaboración de recoñecidos profesionais da arte, a arquitectura e o deseño, así como outras manifestacións artísticas.

Aínda que DIDAC é a sede principal do ciclo e do proxecto, algunhas das conferencias tamén serán impartidas noutros centros e institucións da provincia da Coruña. En todas elas, a asistencia ás conferencias é gratuíta tendo prioridade aquelas persoas que teñan realizado a inscrición previamente. Permitirase o acceso ata completar o aforo. Se desexas reservar a túa praza podes facelo no correo electrónico actividades@didac.gal.



  • Sara Donoso
     

    Sara Donoso

    DIDAC. Santiago de Compostela
    mércores, 19 decembro, 2018 - 19:00

    Experiencia e experimentación. O cinema galego non profesional no término da dictadura

    Tras as escuras décadas previas, os anos setenta comezan en España a avanzar un proceso de cambios sociais e culturais que culminarían coa denominada transición democrática. Este escenario influíu no terreo da cinematografía en Galicia, onde aparecen unha serie de novos autores que tomarán parte no coñecemento das diferentes correntes internacionais, agrupándose en coletivos (Lupa, Imaxe, Enroba) co obxectivo de ofrecer un progreso conceptual desvencellado desa imaxe mitificada de Galicia. Con unha infraestrutura escasísima, estes movementos buscaron explorar a capacidade creativa do cine, interesándose pola relación coas artes plásticas, desligándose do modelo clásico de representación e reivindicando o carácter nacionalista. Esta inclinación por quebrar as lóxicas cinematográficas convencionais foi sen dúbida renovadora, aínda que a proxección e difusión dos seus filmes se reducía a pequenos círculos culturais.

    Sara Donoso é doutora en Historia da Arte pola Universidade de Santiago de Compostela. Actualmente compaxina o labor investigador con colaboracións como crítica de arte e os seus proxectos de educación e mediación cultural, colaborando coa Facultade de Belas Artes de Pontevedra como Community Manager e redactora.
    Entre os seus proxectos recentes destacan a coordinación do ciclo Moda e arte. Confluencias e hibridacións para o MAC de A Coruña, ou o relatorio Cine, paisaxe, pintura. Unha mirada ao audiovisual galego contemporáneo na Facultade de Filosofía da USC. Comisariou, entre outras, exposicións como O deseño na oficina no século XX. Da máquina de escribir ao ordenador persoal; Puntos de pintura ou Loureiro. Perfís de realidade, e coordinou mostras como o 23 Premio Internacional de Gráfica Máximo Ramos 2014 (2014).
    Destacan as súas publicacións Antes, durante, despois. Entrevistas con exestudantes da Facultade de Belas Artes (2018); Paisaxe e pintura no audiovisual galego contemporáneo. Dous casos prácticos que se abrazan dende os extremos: Carla Andrade e Xisela Franco (2016). Colabora con revistas como DARDOmagazine, Fotocinema ou Obradoiro de Artesanía.



  • Pepe Barro
     

    Pepe Barro

    DIDAC. Santiago de Compostela
    martes, 18 decembro, 2018 - 19:00

    As marcas galegas: dos signos aos símbolos, dos artesáns aos primeiros editores.

    As primeiras marcas galegas son signos que identifican a propiedade das bestas do monte, dos aparellos de pesca, ou dos cacharros domésticos. Tamén sinalan a produción dos artesáns: son os signos do traballo. E entre estas primeiras marcas cómpre sinalar o extraordinario patrimonio gráfico do sistema de marcas dos mariñeiros da Guarda, vivo aínda até hai poucos anos. Pero durante a Idade Media comeza a abrollar a intención simbólica das marcas que veremos na Casa da Moeda da Coruña e nos requintados escudos dos primeiros editores-impresores xa no Renacemento: son as marcas dos primeiros obxectos industriais na Galiza.

    Pepe Barro (Pontedeume, 1955). En corenta anos de actividade profesional, o conxunto do seu traballo pode entenderse como unha lectura da Galiza que renova os seus sinais de identidade, incorporando as linguaxes do deseño internacional. Algúns traballos coñecidos: identidade gráfica da Universidade da Coruña ou da empresa Denodo, os primeiros “cuponazos” da Once, a camiseta da Selección Galega de Fútbol, a web da Real Academia Galega, a renovación da Casa de Rosalía de Castro.En 2000 o Museo Reina Sofía, elixiu o de Turgalicia coma un dos cen signos do século XX.O libro Mis queridos diseñadores de Enric Satué dedícalle un capítulo.



  • Miguel Anxo Rodríguez
     

    Miguel Anxo Rodríguez González

    DIDAC. Santiago de Compostela
    mércores, 28 novembro, 2018 - 19:00

    Esculturas, intervencións e desprazamentos. Último terzo do S. XX en Galicia

    O último terzo do século XX veu marcado en Galicia por cambios profundos que afectaron á sociedade, á política e á arte. As artes viviron un proceso de modernización acelerado, visible nas tendencias que sucedían e coexistían, aunando referencias que ían desde a abstracción xeométrica á cultura tradicional, a cultura de masas e as tendencias conceptuais; mesmo ampliando o concepto de escultura ata disolvelo, con intervencións espaciais e efímeras. Pero estes son tamén anos nos que o lugar e a función da escultura no espazo público van estar sometidos a fortes debates e tensións, que duran ata o día de hoxe. 

    Miguel Anxo Rodríguez González é profesor da Universidade de Santiago de Compostela (USC), está especializado en historia da arte contemporánea e teoría da arte. Participa desde 1998 en proxectos de investigación sobre escultura contemporánea, paisaxe urbana e arquitectura, especializándose no contexto de Galicia e norte de Portugal. Ten realizado estadías de investigación en s-Hertogenbosch (Holanda) e en Winchester (Reino Unido). Traballou en torno á historia social da arte na segunda metade do século XX, con estudos sobre procesos creativos, formación artística, e confrontación entre políticas culturais e espazos de creación independentes.

    Autor de S-Hertogenbosch-Sargadelos: a creación en cerámica a través de dúas institucións (2000), co-editor de Espazos de creación contemporánea (2005) e de Canales alternativos de creación. Una aproximación histórica (2013). Foi coordinador entre 2007 e 2011 do máster Arte, Museoloxía e Crítica Contemporáneas, da USC.