![Ângela Ferreira Ângela Ferreira](http://didac.gal/didac/sites/default/files/exposiciones/_DSC0381.jpg)
![Ângela Ferreira Ângela Ferreira](http://didac.gal/didac/sites/default/files/exposiciones/_DSC0368.jpg)
![Ângela Ferreira Ângela Ferreira](http://didac.gal/didac/sites/default/files/exposiciones/_DSC0371.jpg)
![Ângela Ferreira Ângela Ferreira](http://didac.gal/didac/sites/default/files/exposiciones/_DSC0378.jpg)
![Ângela Ferreira Ângela Ferreira](http://didac.gal/didac/sites/default/files/exposiciones/_DSC0363.jpg)
![Ângela Ferreira Ângela Ferreira](http://didac.gal/didac/sites/default/files/exposiciones/06.jpg)
DIDAC. Santiago de Compostela
Ângela Ferreira
Ângela Ferreira
Con esta exposición Ângela Ferreira realiza unha homenaxe á poetisa surafricana Ingrid Jonker (1933-1965), que se suicidou na praia en Three Anchor Bay (Cidade do Cabo), e que loitou cos seus poemas pola individualidade e as liberdades dos surafricanos durante o “apartheid”. A exposición, titulada Talk Tower for Ingrid Jonker, está producida en colaboración con Appleton Square de Lisboa e en colaboración coa galería Filomena Soares, que representa á artista.
En Talk Tower for Ingrid Jonker, a réplica dunha torre de radio, cuxa estrutura alude directamente á forma construtivista da torre deseñada por Alexander Shukhov e construída preto de Moscova en 1920, reproduce o poema “The Kind” (“O neno”) recitado por Nelson Mandela en maio de 1994 no acto inaugural do primeiro parlamento democrático en Sudáfrica. O poema, escrito en Afrikáans, supuxo un berro á liberdade, os dereitos humanos e a democracia, e serviu a Jonker para inmortalizar o momento no que un neno negro morreu por mor dunha bala na cabeza a mans das tropas en Nyanga. A torre, que forma parte dunha serie iniciada por Ângela Ferreira en 2008, foi inicialmente pensada para ser instalada na zona na que Ingrid Jonker penetrouse no mar por última vez. Finalmente, é a fotografía da costa de Cidade do Cabo a que fala dese momento nun xogo irónico onde ao fondo albíscase o cárcere de Robben Island.
Este traballo é característico da obra de Ângela Ferreira na forma en que combina as súas preocupacións ao redor das consecuencias materiais do modernismo e a maneira na que as formas evolucionan en canto viaxan polo mundo. A estrutura forma parte dunha serie de torres que Ferreira iniciou en 2008.
Nada en 1958 en Maputo, Mozambique, Ângela Ferreira creceu e estudou en Sudáfrica, obtendo a súa MFA pola Michaelis School of Fine Arts, Universidade de Cape Town. Actualmente traballa dando clases de Belas Artes na Universidade de Lisboa, cidade na que reside. A obra de Ângela Ferreira está relacionada co impacto actual do colonialismo e o poscolonialismo na sociedade contemporánea, un traballo que leva a cabo a través dunha investigación profunda e a destilación de ideas en formas concisas e resonantes. Ângela Ferreira representou a Portugal na 52ª Bienal de Venecia en 2007 cun proxecto no que continuaba as súas investigacións sobre as formas en que o modernismo Europeo adaptouse, ou fracasou en adaptarse, ás realidades do continente africano trazando a historia da “Maison Tropicale” de Jean Prouvé. Recentemente foi merecedora do premio Novo Banco Photo Award 2015, un dos máis prestixiosos de Portugal. Actualmente é representada pola galería Filomena Soares de Lisboa.