deseño gráfico

Formado en deseño en Barcelona, Alberte Permuy funda en 1992 a empresa Permuy Asociados, conformada por profesionais que abarcan diversas áreas de actividade: produción, impresión, identidade corporativa, deseño editorial, branding, logotipos, deseño institucional, de páxinas web e multimedia. O traballo de Alberte Permuy destaca polo seu compromiso coa cultura galega e a procura de símbolos que a identifiquen. As súas creacións foron expostas en diferentes mostras de deseño gráfico en Lisboa, Atenas, Xangai, o MARCO de Vigo ou o Reina Sofía madrileño. Tamén é coñecido pola creación de Xubi, a mascota do Xacobeo dende 2010, e de entidades corporativas para organismos como a Xunta de Galicia ou o Concello de Santiago de Compostela. Neste caso ocúpase da portada do libro Expresión Atlántica, onde Antón Castro fai un repaso pola arte galega dos anos 80. Conformada a modo de colaxe, a portada destaca polo emprego de cores vivas que contrastan entre sí e unha forma antropomórfica que aporta dinamismo á composición, deixando entrever parte desa plástica da icónica xeración Atlántica ao tempo que reforza o seu carácter plural.

Fillo do polifacético Isaac Díaz Pardo e alumno de Luis Seoane —que será unha influencia fundamental como tamén o será José Martínez Guerricabeltia, creador e director da editorial parisina Ruedo Ibérico e gran coñecedor da tipografía contemporánea—, Xosé Díaz naceu nun mundo de formas, gráficas, deseño e industria. Graduado en Filosofía e Letras pola Universidade de Santiago de Compostela, foi membro fundador de Grupo Revisión e en 1995 emprende a súa traxectoria en solitario con Imago Mundi Deseño. Seguindo o seu particular linguaxe analítico, Xosé Díaz da forma á portada do libro Luis Seoane. Obra poética editado por Edicións Do Castro, onde xenera unha sorte de retícula que emprega a repetición, as formas xeométricas e a combinación da cor e a escala de grises como recursos plásticos.

Fillo do polifacético Isaac Díaz Pardo e alumno de Luis Seoane —que será unha influencia fundamental como tamén o será José Martínez Guerricabeltia, creador e director da editorial parisina Ruedo Ibérico e gran coñecedor da tipografía contemporánea—, Xosé Díaz naceu nun mundo de formas, gráficas, deseño e industria. Graduado en Filosofía e Letras pola Universidade de Santiago de Compostela, foi membro fundador de Grupo Revisión e en 1995 emprende a súa traxectoria en solitario con Imago Mundi Deseño. Nos anos 70 deseña pezas para Sargadelos e produtos gráficos como este disco de Emilio Cao. Iniciador da corrente celta e pioneiro na recuperación da arpa dentro da música tradicional galega como instrumentista dos primeiros cantantes de Voces Ceibes, Emilio Cao presenta o seu primeiro disco titulado Fonte do Araño, fundamental para entender a evolución da música en Galicia. Neses anos setenta, como sinala Pepe Barro, prodúcese tamén unha celtización gráfica popular da que é un exemplo paradigmático este disco deseñado por Xosé Díaz, basado na forma do castro de Armea pero cun aire marcadamente pop.

Uqui Permuy é directora de arte e deseñadora gráfica no estudio uqui.net. A súa carreira cubriu unha ampla gama de campos, con especial énfase en proxectos vinculados á esfera da creación contemporánea. Foi a encargada do deseño do catálogo da mostra Gallaecia Petrea (Cidade da Cultura de Galicia, 2012). En sintonía co obxectivo da exposición, achegarse á cultura e á arte galegas a través da historia da pedra, o libro contempla detalles como unha maquetación clara e ordenada e unha selección de materiais, desde o papel interior en offset de 80 gramos reciclado ata a encadernación acolchada, que conxugan diferentes sensacións táctiles. O volume conforma un conxunto entre contundente e lixeiro buscando, en palabras da autora, «o contraste coa materia pétrea que está evocada na portada por un golpe seco coa iconografía da exposición».